Joan den asteburuan X. Landare berezien azoka ospatu genuen. Eguraldiak lagundu ez arren, larunbatean behintzat, pozik egoteko moduko harrera izan du aurten ere azokak. Guztira eta behin betiko datuak oraindik ez baditut ere, 5200 bisitari izan ziren sarreratik pasatakoak. Nere ustez, sarrera kopuru oso garrantzitsua. Salmenten aldetik ere, orohar, saltzaileak oso gustora zeuden. Beraz oso balantze positiboa egiten dut asteburuarena. Aurten, Aiako kaskoak, lehenengo aldiz, azoka gehigarria jarri zen eta larunbatean harrera haundirik izan ez bazuen ere, igandea, eguraldia lagun, harrera hobea izan zuen. Dena dela, bueltatxo bat eman beharko diogula iruditzen zait.

Ahaztu gabe ezin ditut utzi, bi egunetan antolakuntza lanetan jardun diren bolondres guztiak, bihotz-bihotzetik mila esker. Eta aurten bereziki, batipat larunbatean, euritan eta inolako babesgunerik gabe orduetan lanean jardun zenuten guztiei. Aurrez esan nuen bezela, zuen laguntzarik gabe azoka hau egiteko arazo haundiak izango genituzke. Berriro ere, laguntza eskaerari bikain erantzun diozue.

Euri gogotik egin arren, aurreko igandean ospatu genuen Txakoli eguna arrakastatsua jotzen dut. Jende ugari inguratu zen 24 upategietako txakolina dastatzera eta 400 kg. osatzen dizuzten bi txahal jatera. Azkenean bi txahalak bukatu ziren, 1300 pintxo inguru eta txakolina ere, zenbait upategietakoak behintzat, bukatu ziren.

Beraz berriro ere eskertzea besterik ez zait geratzen Jai Batzordeko kideak, gaztetxoak, harakinak eta lanean jardun zuten denak. Mila esker.

Datorren igandea, apirilak 15, X. Txakoli eguna ospatuko dugu Aian. Goizeko 11.30etatik aurrera, 24 upategietako Txakolina dastatu ahal izango dugu, Eusko Label-eko bi txekorrekin batera. Aurten herriko beste upategi bat ere izango degu, K5 izenekoa. Beti bezela, txakoli kopa 3 euro ordainduz gero nahi adina dastatzeko aukera izango da eta txahal errearen kasuan, pintxo 1 eurotan izango da. Honetaz gain, herriko gaztagileak ere bertan izango ditugu.

Beraz aitzaki polita Aian eta Aiaz gozatzeko.

Martxoaren 11ean ospatu genuen Bizi Iturri jaia, non kirola eta gastronomia elkar uztartuz jai giroa ekartzea genuen helburu herrira.

Hamar egun beranduago bada ere, egindako jaiaren oso balorazio positiboa egiten dut, behin Kirol Elkarteko eta Jatetxeko arduradunekin bilerak izan ondoren. Eta baita ere, herritarrek helarazitako komentarioetatik ere halaxe jaso dugu.

Mendi lasterketan 149 partaide izan ziren, ezarri zen 150 laguneko mugara ia iritsiz. Eguraldia lagun lasterketa polita izan zen eta partaideen ustetan oso ibilbide polita. Baditugu hobetzeko gauzak baina lehen aldia izateko oso harrera ona izan zuen.

Eta bestalde, babarrun jana, herriko zortzi jatetxetan banatuta, 250 “babarrun jale”  bildu ginen, beraz arrakastatsua. Gainera herriko babarruna sustatzeko modu bat ere izan zen eta aurrera begira ere herriko produktuentzat beste bide bat irekita geratu da.

Guzti honi, goiz partean herrian izan genuen giro ederra gehitu behar diogu, lasterkariei begira eta tartean pintxo eta edariak dastatuz.

Ahaztu gabe ez ditut utzi nahi, egun berezi hau aurrera eramateko lanean jardun duten Kirol Elkarteko kide eta laguntzaileak eta jatetxeetako arduradunak. Bene-benetan Zorionak.

Elkarrekin eta elkarlanean etorkizunari ekingo diogu.

Datorren martxoaren 11ean, Bizi Iturri jaia antolatu dugu, herriko jatetxe eta Kirol Elkartearekin batera. Jaia bitan banatzen da, alde batetik kirola eta bestetik gure gastronomia.

Horrela, I. Aiako Mendi Lasterketa ospatuko da, Aiatik abiatu eta Pagoeta mendian barrena berriro Aian bukatzeko. Interesatuek izena emateko aukera www.herrikrossa.com web orrialdean daukate eta baita egun bertan ere Aiako Kultur Etxean. Eta bestetik, herriko zenbait jatetxetan bertako babarruna prestatuko dute. Babarrunak herrikoak izango dira, hauek “sakramentu” guztiekin lagunduta, postrea, kafea eta edariarekin 15 eurotako prezioan. Izena emateko Kultur Etxera deitu behar da, martxoaren 4a baino lehen (Telf. 943130924). Animatu

Hemen Bizi Iturri jaiko kartela.

Ostiralean, otsailak 17,  Foru Aldundian izan genuen bileraren ondoren, 2012. urtean Udal honek, 2011ko UUFF-ko dirubilketa dela eta, bueltatu beharreko diru kopuruaren berri jaso genuen. Honela aurtengo aurrekontuen gainera 135.401,91 euro bueltatu beharko ditugu. Honi, 2009. urteko likidazioaren bigarren zatiari dagokiona bueltatu behar dugu, 85.646,45 euro. Guzti hau kontutan hartuta, 2012. urtean bueltatu beharreko diru kopuru osoa 221.048,36 eurotakoa izango da. Baita ere, diru kopurua hauek lau zatitan bueltatuko ditugu, otsaila, maiatza, abuztua eta azaroan.

Azken urte hauetan bezela, datorren larunbat gauerako, Landabus zerbitzu berezia jarriko dugu martxan, herritarrok ihauterietaz lasaitasunez gozatuz asmoz. Ordutegia zabalduko dugu autobusean bertan eta baita ere www.aiako.com-en izango duzue. Beraz gozatu ihauterietaz.

Joan den asteartean ospatutako Gobernu Batzordeak, Elkanoko frontoi eta txokoa, Altxerriko kobaren museoa eta Kanposantu inguruko ibilbidea jasotzen dituen Plan Bereziari hasierako onarpena eman genion. Aipatutako ekipamenduak aurrera eraman ahal izateko, legez eman beharreko pausoa. Orain, Plan Berezi hau jendaurrean jartzen da 45 eguneko epean, interesatuek iradokizunak aurkeztu ditzaten nahi izanez gero.

Aiako Kirol Elkarteak antolatuta, I. Aiako Mendi Lasterketa ospatuko da martxoaren 11ean. Ibilbidea Pagoeta eta Ernio Txiki mendiko magaletan barrena izango da, guztira 8,200 km. luzera osatuz. Lasterketa laburra izanik ez du zailtasun berezirik ere. Informazio gehiago eta izena emateko www.herrikrossa.com-era zuzendu zaitezkete.

Asteburuan jai izenburuarekin idatzia nuen, azken asteburuan genituen ekintzen berri ematen zuen albistegia. Gaur astelehena balantzea egiteko garaia dela uste dut.

Balantze positiboa egiten dut, alde batetik, larunbateko pintxo poteoa (bihar egingo dugu balantze definitiboa tabernariekin), eguraldia kontutan hartuta, izugarrizko arrakasta izan gabe, jendea bildu ginen eta giro polita sortu, larunbat arratsalde bateko giroa asko hobetuz.

Bestalde atzokoan, izugarrizko jendetza inguratu zen Idien proba ikusteko. Proba plaza jendez gainezka egon zen eta horren inguruan antolatuta zegoen azokan ere jendea gustora ibili zen. Eta nola ez, herriko txakoli eta sagardoa, antxoa, gazta eta atun pintxoekin borobilduta, dastatzeko momentua etorri zenean, 30 minututan dena bukatuta. Eguerdiko 13.15ak ziren eta jendea, nonbait, egarri eta gose.

Bukatzeko, eskerrik beroenak, tabernari, Idi Proba Elkarteko jendeari, Xatur Gaztelekua eta Jai Batzordeko kideei, beraiek gabe asteburu honek ez zuelako inolako berezitasunik izango. Mila esker.